Ráðstefna 2025

Jónas Gestur Jónasson
Endurskoðandi, eigandi og stjórnarformaður Deloitte

Íslenskur sjávarútvegur hefur verið í fremstu röð um árabil og við stært okkur af því að vera “best í heimi” þegar kemur að veiðum, vinnslu og meðferð fiskstofna. En hvernig hefur þetta þróast í tölum?   

Jónas Gestur er endurskoðandi, eigandi og stjórnarformaður Deloitte. Hann er menntaður viðskiptafræðingur og löggiltur endurskoðandi. Í gegnum tíðina hefur hann verið endurskoðandi margra sjávarútvegsfélaga sem og fyrirtækja í öðrum atvinnugreinum. Einnig hann starfað sem ráðgjafi fyrir sjávarútvegsfélög sem og í öðrum atvinnugreinum. Jónas hefur starfað lengur við sjávarútveg, en um árabil var hann fjármálastjóri hjá sjávarútvegsfyrirtæki auk þess sem hann starfaði í fiskvinnslu á yngri árum. 

Valþór Hermannsson
Þróunarstjóri KAPP

Í erindi sínu ætlar Valþór að tala um óson og hvað það gerir fyrir okkur í matvælaiðnaði. Hvernig höfum við verið að nota það hérlendis og erlendis, hvernig er þróunin og hvar eru tækifæri til þróunar? 

Valþór Hermannsson er þróunarstjóri hjá KAPP  hann hefur mikla reynslu í vélsmíði og þjónustu við sjávarútveg og matvælaiðnað. Áður en hann gekk til liðs við KAPP stýrði hann hátæknifyrirtækinu RAF í tæplega 20 ár. Valþór hefur unnið að ýmsum verkefnum í gegnum tíðina og má nefna þar á meðal SCADA kerfi, CO2 krapakerfi og um 20 ára reynslu á framleiðslu, notkun og þjónustu á ósonkerfum.

Bragi Smith
Viðskipta- og þróunarstjóri iTUB á Íslandi

Bragi mun fjalla um þróun nýrra og margnota kera sem flytja ferskan lax frá framleiðendum í vinnslur í Evrópu. Lífsferilsgreiningar sýna að margnota umbúðir eru allt að 80% umhverfisvænni í samanburði við einnota umbúðir. Notkun keranna getur sparað umtalsverða fjármuni, bæði í umbúða- og flutningskostnaði. Einnig mun Bragi fara yfir þá rannsóknar- og þróunarvinnu sem þarf til að kynna nýjar og endurvinnanlegar umbúðir fyrir flutning á ferskum laxi. 

Bragi Smith er með MBA gráðu frá University of New Haven í Bandaríkjunum. Hann starfar sem viðskipta- og þróunarstjóri hjá iTUB á Íslandi. Hans helstu verkefni eru að leiða sölu félagsins á Íslandi og vinna að viðskiptastefnu þess. Áður starfaði Bragi sem markaðsstjóri OMAX heildverslun og setti á laggirnar Lín Design sem hann rak til ársins 2017. Hann hefur einnig starfað í bankageiranum, lengst af hjá Kaupþingi sem viðskipta- og eignastjóri. Helstu verkefni Braga síðustu ár hefur verið að innleiða og kynna endurnýtanlegar umbúðir fyrir sjávarútveginn samhliða því að þróa nýjar lausnir fyrir veiðar, vinnslu og flutning á hráefni þar sem áhersla er lögð á sjálfbærni og endurvinnslu. 

Sigurður Jónas Bergsson
Tæknistjóri hjá Kælismiðjunni FROST

Í erindinu verður fjallað um þær breytingar sem átt hafa sér stað á kæli- og frystikerfum í sjávarútvegi ásamt því að fara yfir þær áskoranir sem síbreytilegar umhverfiskröfur hafa í för með sér, sem og auknar öryggis og gæðakröfur sem gerðar eru til þessara kerfa. Þá mun Sigurður leitast við að skýra hvar við stöndum í samanburði við okkar samkeppnislönd er varðar tæknivæðingu á kæli- og frystikerfum í sjávarútvegi. 

Sigurður Jónas Bergsson er með B.Sc. í véla- og orkutæknifræði og starfar sem tæknistjóri hjá Kælismiðjunni FROST. Starfssvið hans er hönnun og verkefna stjórnun á kæli- og frystibúnaði í sjávarútvegi, hönnun varmadælukerfa til upphitunar og nýtingu glatvarma í iðnaði auk þess sem hann er með sérverkefni á sviði þurrkunar s.s. sjávarafurða og lyfjaiðnaðar. Hann hefur verið virkur í þróun nýrrar kælitækni, þar á meðal segul- og hljóðbylgjufrystingu, sem bætir gæði og ferskleika sjávarafurða. Sigurður hefur einnig tekið þátt í fjölmörgum rannsóknum og verkefnum sem miða að því að bæta frystiferli og auka orkunýtingu.

Ásþór Sigurgeirsson
Hönnuður hjá Slippnum

Ásþór ætlar að fjalla um stöðuna í greininni, hverjir eru styrkeikar og veikleikar tæknifyrirtækja. Hverjar eru áskoranir og framtíðarhorfur í tæknimálum? 

Ásþór er vélfræðingur og sjávarútvegsfræðingur og starfar sem hönnuður hjá Slippnum. Hann hefur komið að ýmsum verkefnum hjá Slippnum meðal annars hönnun á sjálfvirku flutningskerfi í lest togskipa og þróun á búnaði sem eykur gæði og einsleitni hráefnis úr blæðingar og þvottaferli bolfisks.  

Sóley Kaldal
Sérfræðingur hjá Matvælaráðuneytinu

Málstofustjóri leiðir umræðu efni málstofunnar. Þá mun málstofustjóri passa uppá tímanotkun allra og reka áfram með harðri hendi þannig að skilaboð séu hnitmiðuð og hægt að ræða betur í pallborði. 

Sóley Kaldal er samningamaður og sérfræðingur í erlendu samstarfi á skrifstofu Matvælaráðuneytisins. Hún er áhættustýringar- og öryggisverkfræðingur að mennt og hefur víðtæka þekkingu á sjávarútvegi. Hún er með M.A.S. gráðu í alþjóðasamskiptum frá Yale háskóla og hefur diplómagráður í stefnumótunaraðferðum byggðum á sannreyndum staðreyndum, í hafrétti og stefnumótun og fleira. Hún hefur m.a. unnið að greiningum á öryggi íslenskra hafsvæða og ráðgjöf um kerfislægar útbætur. Áður starfaði Sóley hjá Landhelgisgæslunni þar sem hún leiddi alþjóðasamskipti með áherslu á norðurslóðamál og þjóðaröryggi en auk þess hefur hún veitt þjóðaröryggisráði ráðgjöf og komið að fjölmörgum verkefnum sem snúa að öryggi og hagsmunum Íslands og íslenskra hafsvæða.